सुनसरी, पौष १३ गते । सुनसरीको कोशी गाउँपालिका वडा नं. १ स्थितबाट पेस्तोल सहित २ जना भारतीय नागरिकलाई प्रहरीले पक्राउ गरेको छ । साेमबार जिल्ला प्रहरी कार्यालय सुनसरी र इलाका प्रहरी कार्यालय लौकही सुनसरीबाट खटिएको प्रहरी टोलीले गोप्य सुचनाको आधारमा सुनसरीको कोशी गाउँपालिका वडा नं. १ स्थित बि.एस. होटलबाट भारत बिहार अररिया, बासमटियाका ३५ बर्षिय बिधानन्द राम र २४ बर्षिय हासिम अंसारीलाई २ थान पेस्तोल सहित पक्राउ गरिएको थियो ।
होटलको कोठामा बसिरहेको अवस्थामा कोठा खानतलासी गर्दा निजहरुले ओछ्यानमा लुकाई राखेको अवस्थामा पेस्तोल २ थान, म्याग्जिन ४ थान, ७.६५ एमएम को गोली ३ राउण्ड बरामद गरिएको थियाे ।
तीनीहरुकाे साथबाट मोबाइल १ थान, बी आर ५० के ०१४९ नम्वरको मोटरसाईकल र भारतिय २ हजार रुपैया समेत बरामद भएको थियाे । पेस्तोल सहित पक्राउ परेका दुवै जनाको जिल्ला प्रहरी कार्यालय सुनसरीबाट थप अनुसन्धान भईरहेको छ ।