विराटनगर, आषाढ २० गते । मोरंगको ग्रामथान गाउँपालिका वडा नं. ४ मोतिपुरमा ८ करोड भन्दा बढीको लगानीमा पक्की पुल निर्माण भएको छ । सो पुलको पूर्व बेलवारी गाउँपालिका वडा नं. ५ मा परेको छ ।
उक्त पुलले दुहबी–तेतरिया–मोतिपुर–चन्द्रगढी जोड्ने रणनीतिक सडक पनि जोड्ने स्थानीय बताउँछन् । संघीय सरकार सडक विभागद्वारा पुल निर्माण भएपछि भद्रपुरदेखि इनरुवासम्म जान तथा नयाँ बजार–मोतिपुर– सिद्रहा हुँदै बेलबारीसम्म जानका लागि पनि सजिलो हुने भएको छ ।
झण्डै ९७ मिटर लामो पुलका लागि सरकारले भ्याट बाहेक ८ करोड ३५ लाख ४५ हजार ७७८ रुपैयाँ लगानी गरेको छ । २०७४ साउनमा आएको बाढीले बगाएको मोरङ बेलबारी ५ र ग्रामथान जोड्ने लोहन्द्रा पुल अझै निर्माण भएको छैन । जसका कारण बाढीको समयमा सर्वसाधरण वारिपारि गर्न बञ्चित बनिरहेको बेला त्यसको विकल्पका झण्डै ७ किलोमिटर दक्षिणमा पर्ने उक्त पुल निर्माण भएपछि आवतजावतमा धेरै सहजता भएको ग्रामथान ४ का स्थानीय खिलेश्वर सुवेदी बताउँछन् ।
यसअघि सोही क्षेत्रबाट थुप्रै पटक निर्वाचित भएका सांसद महेश आचार्यले पुल निर्माणमा चासो दिएनन् तर, जनप्रतिनिधि परिवर्तन भएसँगै बढाएको पहलले पुल बनेको सुवेदीको दाबी छ । धरानको सूर्या एण्ड सन्स प्रा.लि. नामक निर्माण कम्पनीले २०७५ वैशाख १३ गतेदेखि काम सुरु गरेको थियो । सडक डिभिजन कार्यालय विराटनगरका इन्जिनियर सुरेश झाका अनुसार अबको डेढ महिनाभित्र शतप्रतिशत पुल निर्माण हुने बताए । हाल ९५ प्रतिशत काम सम्पन्न भइसकेको झाको दाबी छ ।
बेलबारी र ग्रामथान गाउँपालिका जोड्ने पुल यसअघि लोहन्द्राको खोलामा आएको बाढीले बगाएको र त्यहाँ बनिनसकेको कारण यो बाटो एकदमै उपर्युक्त रहेको त्यस क्षेत्रका निवर्तमान संघीय सांसद अमनलाल मोदीको भनाइ छ । आफूले निर्वाचनको बेला प्रतिबद्धता जाहेर गरे अनुसार ठूलो मेहनतले पहल गर्दा पुल निर्माण भएको मोदीको भनाई छ ।
पुल बनेपछि किसानलाई धेरै सहज भएको ग्रामथान गाउँपालिकाका अध्यक्ष शिवनारायण माझीले बताए । ‘बाढी आयो भने खोलाबाटै तर्नुपर्ने बाध्यता किसानलाई थियो, पुल बनेपछि खेतिपातीमा जान आउनका लागि पनि किसानलाई सहज भएको छ,’ उनले भने, ‘बेलबारी, कसेनी, मोतिपुर जोड्न मात्रै नभएर झापाको भद्रपुरबाट विराटनगरसम्म आउजाउका लागि पनि यो पुल महत्वपूर्ण रहेको छ ।’
‘खेती पारी छ, घर यता छ, एता स्कुल छ उता घर छ, हाटबजार जान आउन पनि असहज अवस्था थियो,’ ग्रामथान–४ का स्थानीय खिलप्रसाद दाहालले बताए, ‘पुल निर्माण भएको छ, यसले हामीलाई धेरै सहज भएको छ ।’
सोही पुलको सुरक्षाका लागि बाँध निर्माण पनि धमाधम भइरहेको छ । ४८ लाख रुपैयाँ लागतमा यस वर्ष बाँध निर्माणको काम भइरहेको कोशी तथा बक्राहा नदि व्यवस्थापन आयोजना प्राविधिक शाखाका इन्जिनियर कृष्णप्रसाद खतिवडाले बताए ।