विराटनगर, असोज २३ गते । नेपालमा शुरु हुन लागेको महान चाडपर्व दशै, तिहार र छठ पर्वमा आतिबाजी गर्ने उदेश्यले लुकीछिपी भारतवाट पटका नेपाल भित्रन शुरु भएको छ ।
सुनसरी जिल्लाको इटहरी उपमहा नगरपालिका वडा नं. ५ स्थित राजमार्ग एरियावाट पटका सहित दुई जनालाई प्रहरीले पक्राउ गरेपछि सो कुरा खुलेको हो ।
पक्राउ पर्नेमा सुनसरी श्रीपुरका १९ बर्षीय आलम मिया र सोही स्थानका २७ बर्षीय समिर मिया रहेका छन । विशेष सुराकका आधारमा खटिएको प्रहरी टोलीले उनीहरुलाई पक्राउ गरेको जिल्ला प्रहरी कार्यालय सुनसरीले जनाएको छ ।
राजमार्ग किनारमा पटका बोरा तथा कार्टुनमा लुकाई छिपाई राखेर सप्लाईका लागी मौका छोपी बसिरहेको अवस्थामा उनिहरुलाई नियन्त्रणमा लिईएको थियो ।
नियन्त्रण संगै बोरा तथा कार्टुन खोलेर हेर्दा श्री विजय कोबरा नामको पटाका–६७ बण्डल पटका फेला पारी बरामद गरिएको हो ।
भारतवाट लुकाई छिपाई पटका नेपाल भित्रियाउने दुवैलाई पक्राउ गरी थप अनुसन्धान तथा कानुनी कारबाही अगाडी बढाईएको जिल्ला प्रहरी कार्यालय सुनसरीले जनाएको छ ।