विराटनगर, फाल्गुन १५ गते । बागमती महिला टोलीलाई ३–० को सोझो सेटमा पराजित गर्दै एपिएफ महिला टोलीले महिला भलिवलको उपाधि जितेको छ ।
नेपाल खेलकुद महासंघ कोशी प्रदेश कमिटीको आयोजना तथा कोशी प्रदेश खेलकुद विकास बोर्डको संयोजनमा सम्पन्न मुख्यमन्त्री कप राष्ट्रिय महिला भलिबल प्रतियोगिता २०८१ को उपाधि सशस्त्र प्रहरी बल (एपिएफ ) क्लबले जितेको हो ।
दमक स्थित हिमालय माध्यमिक विद्यालयको मैदानमा सम्पन्न फाईनल खेलको पहिलो सेटमा एपिएफले २५ अंक हासिल गर्दै बागमतीलाई १० अंकमा रोक्न सफल भएको थियो भने दोस्रो सेटमा एपिएफले २५ अंक जित्दा बागमती २२ मा रोकिएको थियो ।
अन्तिम सेटमा बागमतीले १८ अंक प्राप्त गर्दा एपिएफ २५ अंक जित्दै उपाधि आफ्नो पक्षमा पार्न सफल भएको थियो ।
प्रतियोगिताको उपाधि जित्दै एपिएफले ट्रफी, मेडल, प्रमाणपत्र सहित ५ लाख र उपविजेता बागमतीले ट्रफी, मेडल, प्रमाणपत्र सहित ३ लाख प्राप्त गरेको छ । फाईनल खेलमा उत्कृष्ट प्रदर्शन गर्नुभएको एपिएफको कविता भट्ट ’वुमन अफ म्याच’ बन्न सफल हुनुभएको थियो ।
त्यस्तै, प्रतियोगिताको उत्कृष्ट खेलाडी एपिएफकी निरूता ठगुन्ना, उत्कृष्ट सर्भर कविता भट्ट, उत्कृष्ट डिफेन्डर शान्तिकला तामाङ, उत्कृष्ट स्पाइकर सलिना बुढा मगर, उत्कृष्ट ब्लकर सुमित्रा रेग्मी, उत्कृष्ट सेटर जस्ना महतो र उत्कृष्ट कोच महेश चौधरी हुनुभएको थियो ।
उत्कृष्ट खेलाडी ठगुन्नाले ट्रफी सहित नगद २५ हजार र अन्य विधाका उत्कृष्टहरूले ट्रफी सहित जनही १० हजार प्राप्त गर्नु भएको थियो ।
प्रतियोगिताको विजेता लगायत अन्य उत्कृष्ट खेलाडीलाई कोशी प्रदेशका संस्थापक मुख्यमन्त्री शेरधन राई, कोशी प्रदेश खेलकुद विकास बोर्डका सदस्य सचिव कृष्ण बस्नेत ( पर्शुराम ) लगायतले ट्रफी, मेडल हस्तान्तरण गर्नु भएको थियो ।