बिराटनगर, कार्तिक १४ गते । वेमौसमी बाढीले बगाएर मृत्यु भएका विराटनगर महानगर पालिका वडा नं. १ निवासी २१ वर्षीय सञ्जित कामतको आफन्तलाई काजकिरिया खर्चका वापत ५० हजारको चेक हस्तान्तरण गरिएको छ ।
बिराटनगर महानगरपालिका अन्तर्गतको विपद समितिको बैठकबाट कात्तिक २ र ३ गते परेको वेमौसमी अविरल वर्षाका कारण आएको बाढीबाट मृत्यु भएकाहरुको परिवारलाई किरिया खर्च वापत जनही ५० हजार उपलब्ध गराउने निर्णय गरेको थियो ।
उक्त निर्णय अनुसार सो रकमको चेक विराटनगर महानगर पालिकाका मेयर भीम पराजुलीले कामतको घरैमा पुगेर उनका बुवा बैजनाथ कामतलाई चेक हस्तान्तरण गरेको हो ।
डुबानमा परेको घरभित्रबाट सामान निकाल्ने क्रममा सिंघिया खोलाको बाढीले कामतलाई बगाएको थियो । तीन दिनपछि उनको शव परोपकारघाट छेउमा फेला परेको थियो ।
चेक हस्तान्तरणको अवसरमा मेयर पराजुलीले भने जीवनको अगाडि पैसाको मूल्य नभएपनि मजदूरी गरेर खाने कामतका परिवारलाई काजकिरियाका लागि प्रदान गरिएको रकमले केहि मद्दत मिल्ने वहांको भनाई थियो ।
बिराटनगर महानगर पालिकाको पुर्वमा सिंघिया खोला र पश्चिममा केशलिया खोलामा आएको वाढीले प्रत्येक वर्ष नागरिकलाई दुःख दिने गरेको भन्दै महानगरपालिकाले बाढी र डुबान व्यवस्थापनको कार्यलाई जारी राखेको बताए ।
त्यसैगरी बाढीका कारण मृत्युवरण गरेका राई र भुजेलका आफन्तलाई सोमबार काजकिरिया वापतको ५० हजारको चेक हस्तान्तरण गर्ने भएको छ ।