विराटनगर, माघ २५ गते । प्रदे नं. १ को प्रदेश सभाको सातौ अधिवेशन सदनमा कुनै प्रक्रिया अघि नबढी स्थगत भएको छ ।
संसदीय कार्य परामर्श समितिको बैठकमा सदन चलाउन सहमतिको प्रयास खोज्दा पनि सहमति जुट्न नसकेपछि बैठक स्थगन गरेको सभामुख प्रदीपकुमार भण्डारीले जानकारी गराएका थिए ।
सदन प्रारम्भ भएपश्चिात सत्तापक्षका प्रमुख सचेतक बुद्धिकुमार राजभण्डारीले संसदीय क्रियाकलाप विपरित काम गर्ने १६ जना सांसदहरुले संसदको कुनै पनि गतिविधिमा भाग लिन नपाउने बैठकको प्रारम्भमै उभिएर प्रस्ताव गरेपछि सभामुख भण्डारीले तत्काल बैठक अन्त्य गरी फागनु ९ गते बस्ने घोषणा गरेका थिए ।
नेपाल कम्युनिस्ट पार्टी (नेकपा) का बहुमतको सरकारमा ३७ जना सांसदले सरकारप्रति अविश्वासको प्रस्ताव दर्ता गराएको थियो भने ती मध्ये पाँच जना सांसदहरुले सो प्रस्तावबाट आफ्ना नाम फिर्ता लिएका छन् भने सत्ता पक्षले १६ जना सांसदलाई सरकार विरुद्ध क्रियाकलाप गरेको आरोपमा निलम्वन गरेको थियो ।
प्रमुख सचेतक राजभण्डारीले सदनमा आएको गतिरोधलाई अन्त्य गर्न र सदनलाई सुचारु बनाउन अब अन्य राजनीतिक दलहरुसँग छलफल एवं परामर्श गर्ने जानकारी दिए भने प्रमुख प्रतिपक्ष नेपाली काङ्ग्रेस संसदीय दलका नेता राजीव कोइरालाले संसदीय अभ्यासमा पहिलो पटक सत्तापक्षबाट नै संदन सञ्चालनमा अवरोध सिर्जना हुनु आश्चर्यको विषय भएको प्रतिक्रिया दिए ।